کراچی: سابق کپتان اور وکٹ کیپر بلے باز راشد لطیف نے اسپیڈ اسٹار شعیب اختر اور پی سی بی کے قانونی مشیر تفضل رضوی کو کورٹ سے باہر معاملہ حل کرنے کا مشورہ دے دیا۔

راشد لطیف کا کہنا ہے کہ پاکستان کرکٹ بورڈ کو مصالحت کا کردار ادا کرنا چاہیئے تھا۔

اس سے قبل شعیب اختر اور تفضل رضوی والے معاملے پر سابق کپتان یونس خان نے اسپیڈ اسٹار کی حمایت کرتے ہوئے کہا تھا کہ شعیب اختر نے پی سی بی کی قانونی ٹیم کے متعلق سچائی بیان کی ہے، کرکٹ بورڈ ان کے ریمارکس کا نوٹس لے۔

سابق کپتان نے ٹوئٹ میں لکھا تھا کہ معاملے پر شعیب اختر کے ساتھ کھڑا ہوں، انہوں نے جو کڑوا سچ بیان کیا ہے اس کا نوٹس لینا چاہیئے۔ پاکستان کرکٹ کی بہتری کیلئے پی سی بی ان ریمارکس کا دیانت داری سے جائزہ لے۔

واضح رہے کہ تفضل رضوی نے معاملے پر شعیب اختر کو ہتک عزت کا نوٹس بھیج رکھا ہے۔